1Cor 6 | BEF | STEP | Lenalitogati moneuba ya'ma lalu'afihi foipana'a lito nohilinauba ai ana kaga'a ya'ma mono bona'magitoga lu huto mehuse mono'ani meni'ina bona'i enalitoga bite ka foya lulata nohina ya nasana'mu lenubuya menohifihe?

1 Corinthians 6

Mono'ani meni'ina bona'magihi enubulo foipanamofihi ka'a melilo

1 Lenalitogati moneuba ya'ma lalu'afihi foipana'a lito nohilinauba ai ana kaga'a ya'ma mono bona'magitoga lu huto mehuse mono'ani meni'ina bona'i enalitoga bite ka foya lulata nohina ya nasana'mu lenubuya menohifihe? 2 Lali Hu'mamofihi bona'a nohunogo alihi fegutoga bona'magihi ka'ani loko hiluta'a mekeheli'ahana ni'ifihe? O'yo, alihi lenali fegutoga bona'magihi kaga'ani loko hilabe. To ya hilana'a ni'igo henabe lite lenali folagahatinigu ni'ina ka nesi'asi ni'ina'a loko menehabe? 3 Lenali nekehelifihe? Lali minoto agelo bona'magihi kaga hiti loko huto lilune'mu hune. Ya hu'ehina ana'ina fa'mene nasana ya'ma huto hulenogomo, keta mehuse huto fa'mene lu laga hilune'mu hune. 4 Yamofihi kaga'a huto nehinogomo lenali hena'mu Hu'mamofihi bona'i nohuta lali nokehelutogo limilata nohina bo enalitoga lelite bilago lu laga hi lepelelata nehabe? 5 Lenali ya'ma kaga kehelinogo lenubuya hilibe luto lu nolepube. Lenalitoga ekesa hokolo hina bo mone menohifihe? To lenalitoga kagatini huto nehinogomo aitoga lelite binogo le'mo fulu lepalalinamoya, lenali ya'ma ya suhi menehana yabe. 6 Lenalitoga moneuba lalu'afi hiti foipana'atiti huto hulenogomo Hu'mamofihi mekeheli'ahana bona'magitoga lelito bigo lu laga hi ete'ahabe. Bati mehina suhi nehabe. Lenali ka foya huto hulata nohina yanauba mono katini li kele lilata nohibe.

7 Lenali bona'a mone'amagi foipana hi lepelenogomo henabe lite legese hite fa'mene meneminabe? Lenele'mo sibina hinogo ya bati hitine. To ai foyagu le'mo melenogo ai ka foyagu le'mo melenogo nehite ya bati mehu'ehibe. 8 Lenali ya'ma lenalitini hiti ana nasana li sibina nehago gumina bauka nelata nehabe. Ya nehite lenali kogunatini hiti ana suhi hi epelelata nehabe. 9 Ana'ina foipana lilata nehana bona'magi Hu'mamofihi ai kapo'agu henetilana'a meni'ibe. Yamofihi mone keheli'ahafihe? Lenali komopatinigu keheli sibina mehilo. Moko takolo bona'i to nalisa lugefa bona'i to ibe sili abe sili bo to bo luga'a bomagihi enugufa li sibina nehite ana'magi suhi hite minese bo 10 to gumina taminalo bo to fe'nohi samahi tito lilube lilata nehana bo to bia nagamitoko humofa'na nehana bo, to enemegeka lilata nehana bo, to fakupa ka lite luba hilata nehana bo, ya nehana'amagihi Hu'mamofihi kapogu metilana'mu yabe. 11 To lenali luga'a koyapa'i ya suhi hite mine'ahanamo ninaya yatai foipanatini ahe'mi lepoloto Hu'mamofihi bona'i minalabe luto komopatini okala huto le'mo babahi higo nehabe. Sipi Boti Yesu Kilisitohi gi'alo yabe luto to Hu'mamofihi Sikalafu'amofihi gi'amu luto lenele'mo bati higo nehabe.

Hu'mamofihi gi'a lenugufatinitu hofa talo

12 Lenali asaga hapa'a keya'i meni'igo bati huto hiluta'mu yabe lite lilata nehabe. Ma'naka nelanaya to asaga hapa'a yanauba lenele'mo bati mehilina'mu yabe. To nani ana huto asaga hapa'a bati huto hilune lite nelana ka mege'i malalufiye? O'e. Mone hapauba naga'i nimilenogo bati mehibe. 13 Lenali ya'ma nose'na lipagu nasana ni'ibe to gupatigu ya'ma nose'na'mu ni'ibe lite lilata nehabe. Ma'naka nelanaya minoto Hu'mau ai ana hiti ana hiti he'minogo fa'menena lolo hilube'mu higo su halina'mu yabe. Lugufauba ya'ma moko'mu yabe luto meni'ibe. Sipi Bomofihi nasana ni'ibe. To Sipi Bouba ai'a lugufamofihi afo'afu nohibe. O'yo, lali aku alihi Hu'mamofihi bulo ho tito minonogo ai lugufa'mu ka foya li letalina'mu. To lali lugufatu Sipi Bomofihi gi'a li hofa talune. 14 To Hu'mau Sipi Bo Yesu fili'ehinaguti le'mo ho ti'ehina ana suhi huto amuya'aloti lali'i lugufamo lele'mo ho tilube'mu hibe.

15 Mega lenugufauba Kilisitohi gufa'amofihi nekisa'a ni'ina yamofihi menekehelifihe? To Kilisitohi gufa'amofihi nekisa'a mone kapolo a'i hiti le'mo moneko'na hilupihe? Ai ya huto meni'ibe. 16 Lenali ya lite menekehelifihe? Bo moneuba mokolo a'i moneto i kelelenogo etali etugufa'atiti le'mo moneko hilete minala'ina yamofihi mono bukugu fayaha kaga mone ma luto ni'inamo ni'ibe:Etali loemale'ititihi etugufa'atiti moneko lolo hulenogo hepite minala'ibe. 17 Ya huto ni'inaya luga'amagi enali Sipi Bomofitoga i hepilenogo ai hiti komopa'ani moneko lolo hilube'mu hibe.

18 Lenali moko takolo nasana mele'isi he'mite bilo. Bona'i moneuba fato foipa nasana lilina ya nasanauba ai'a gufa'alo le'mo sibina mehilibe. To moko tako lilina ya nasanauba ai'a gufa'a komopa'a le'mo sibina hilina'mu yabe. 19 Lenali ya'ma lite mekeheli'ahafihe? Lenugufatini ya'ma Sikalafu'mofihi sipi mono nohi ni'ibe. Hu'mau lenali lenugafamofihi komopa'agu minoto lito hilibe luto molo lepolo'ehina yabe. Lenali ana lenugufamofihi afo'agita menehabe. 20 Hu'mau lenali mina'a fi lepolo'ehinamo ni'igo lenali lenugufamofihi ai'asigo ni'ibe. Ya hu'ehina'mu lenugufauba Hu'mamofihi gi'a fi hele hu eteno.